Jyriitinen neuvonantaminen
Koulutus
Vaikuttaa yhtheiskuntaa
Antitiskrimineerinkitoimisto Länsi antaa jyriitistä neuvoa ja tukea sille jotako oon tiskrimineerattu. Met piämä luentoja ja annama koulutusta tiskrimineerinkistä ja kunka sitä saattaa vastustaa.
Sulla oon oikeus ellää ilman tiskrimineerinkiä. Politiikoila ja muila vallassaolevilla oon velvolisuus valvoa ette tiskrimineerinkiä estethään. Met tehemä töitä ette vaikuttaa niitä ottamhaan vastuunsa.
Meän työ rakentautuu ihmisoikeukshiin ja ruottalaisheen tiskrimineerinkilakhiin.
Neuvonantaminen
Meän jyristit antavat ilhmaisia neuvoja ja tukea
Tiskrimineerinki oon, lyhykäisesti sanottu, ko joku joutuu epäetulisheen asenthoon verrattuna toisheen vastaavassa tilantheessa.
Se oon ihmisoikeus ette saaja ellää vaphaana tiskrimineerinkistä. Ruottalaisessa lakisäätänössä tiskrimineerinki oon rikos. Mutta kaikki epäoikeukset ei ole tiskrimineerinkit lain mukhaan.
Met saama useasti kysymyksiä mitä met saatama tehhä ette auttaa ihmisiä. Jokku tavalisiimista kysymyksistä oon:
Kukkas saattavat saaja apua teiltä?
Met annama ilhmaista jyriitistä neuvonantamista tiskrimineerinkistä muun muassa privattihenkilöile, organisasuunile, työnantajille ja kouluile Länsi Jööttalantirekiuunissa, paitti kunnile Fyrbodaalissa. Jos oon kyse tiskrimineerinkistä työelämässä ja sie töntekiännä olet jäsen jossaki ammattiliitossa sie piät kääntyä sinne ensinä.
Milläs laila tet saatatta auttaa?
Jos sie koet ette sinua oon epäoikeuenmukhaisesti kohelttu sie saatat ottaa meän kansa yhtheyttä. Se ei maksa mithään. Met saatama antaa neuvoja ja tutkia eppäilttyjä rikoksia tiskrimineerinkilakia vasten. Monet epäoikeuenmukhaiset tilantheet ei ole lain mukhaan tiskrimineerinkiä.
Met emmä saata antaa jyriitistä apua muila oikeusaluheila. Jos met arvioima ette kysymys ei kuulu tiskrimineerinkilain alle met yritämmä viitata eemäs.
Kunkas tet tehettä töitä yhen asian kansa?
Ko joku ilmottaa tiskrimineerinkiä meile met saatama tutkia ilmotusta asianna meilä. Tutkimus tarkottaa ette met kokoama informasuunia ja toistuksia niin ilmottajalta ko siltä jotako ilmotethaan.
Met emmä ota jyriitistä kantaa asiassa ennenko tutkimus oon lopetettu. Jos met arvioima sen rikokseksi tiskrimineerinkilakia vasten met astuma sisäle eustajanna ilmottajalle. Semmonen prosessi tarkottaa ette met yritämmä löytää ratkasuja ongelmalle sen mukhaan ko ilmottaja halvaa ja mitä met arvioima maholiseksi. Se saattaa esimerkiksi olla kyse antheeksipyynöstä, koulutustoimista, rahalisesta korvauksesta elikkä oikeuenkäyntiprosessista.
Mitäs mie piän tehhä ilmottajanna?
Se oon kauhean tärkeätä ette ilmottaa kätevästi. Tiskrimineerinkilakila oon aika lyhykäiset preskripsuuniaijat – aika ko asian pittää lopettaa – johonka met hääymä suhtautua.
Se vaatii läheistä yhtheistyötä ilmottajan kansa ko Antidiskrimineringsbyrå Väst tutkii asiata. Meän jyristillä oon rajotetut maholisuuet ette koota sisäle toistuksia ja muuta tokymentasuunia. Ilmottaja pittää itte jättää sen toistuksen jotako tarkistethaan ko asiata tutkithaan. Se saattaa olla kyse esimerkiksi preivistä, e-postista, SMS:istä, päätöksistä, valokuvista, ääninauhotuksista, viiteofilmistä, henkilöistä jokka saattavat toistaa ja vastaavaa.
Kunkas pitkhään tutkimus kestää?
Tutkimus vaatii useasti aikaa ja vaati yhtheistyötä ilmottajan ja jyristin välissä joka tutkii asiata. Se oon hankala antaa eksaktin vastauksen kunka pitkhään tutkimus kestää, mutta se saattaa olla kyse usseista kuukausista ja jopa jostaki vuestaki riippuen minkälainen asia oon.
Saatankos mie vain tulla ja soittaa ovikelloa?
Ei, sie piät ottaa meän kansa yhtheyttä ja varata aijan ette kohata jyristiä.
Mitäs stryktyrelli tiskrimineerinki tarkottaa?
Tavalinen määritelmä oon ette koko väestöryhmää tiskrimineerathaan epäetulisitten elantoehoitten takia. Se saattaa muun muassa olla kyse huonomista maholisuuksista ette saaja työtä, huonompaa saatavuutta hoithoon ja halveksuvia atityytiä. Lait, säänöt ja normit oon esimerkkiä kunka stryktyrelliä tiskrimineerinkiä saatethaan säilyttää.
Mie en ole koskhaan kuulu teän toiminasta. Miksis tet että informeeraa enämpi siittä?
Iteällinä organisasuunina meilä oon rajotetut maholisuuet ette saaja yhtheyttä kaikitten 34 kunnan kansa jokka oon meän vaikutusaluheela.
Kotisivun lisäksi meilä oon konttuja sosiaalila meetioila jossako met päivitämmä informasuunia tiskrimineerinkistä, ihmisoikeuksista ja mitä meilä tapahtuu.
Jyriitisen neuvonantamisen lisäksi osa meän työstä oon ette vaikuttaa vallassaolevia. Niilä oon velvolisuus ottaa päätöksiä jokka oon oikeuenmukhaisia ja jokka ei tiskrimineeraa yhthään väestöryhmää. Meän vaikutustyö oon niin kansalinen ko paikalinen.